رجعت ايام البلدية ايام النضافة
رجعت أصوات الدورية تكسر المسافة
يا حلوة لا تخافي
اذا عندك اشيا عتيقة، قناني فضيت، علب عتقت،
رسايل خلصت مدتها ونسيتيها
وبعدك ما خزقتيها، هاتيها
نضّفوا الأرض مليح بكرا جايي النظام
ما تخلّوا قشر موز أحلى ما يزحط الحكم
وتتفركش الدولة أوعا
يا شباب شوي شوي حفّرتو هالساحة
روقي يا جمانة روقي
يا شباب شوي شوي البلاط بيتجرح
روقي يا جومانة روقي
عم ننضف الماضي وآثار الحرب
ونلمّع الحزن اللي عتق بالساحات
اذا لمّعتو الحزن بيرجع يوهج
ونحنا بدنا نطفّيه
نزل بكي كتير الدمع بيطفّي الحزن
الدمع بيرجع بيشعّل الحزن
مرق وقت كتير الوقت بيطفي الحزن
مرق وقت كتير خلف الوقت النسيان النسيان
بيزهّر ع الأحزان
بكل الساحات رشوا النسيان
ع كل القلوب رشوا النسيان
تيناموا اللي ناموا اكتر اكتر يناموا اكتر اكتر
تيوعوا اللي وعيوا اكتر يوعوا اكتر يوعوا اكتر
كل بيت كل قلب كل ضيعة ووين ما كان
رشوا النسيان رشوا النسيان