حاجي تعاتبني يئست من العتاب.. ومن كتر ما حملتني هالجسم داب
حاجي تعاتبني وإذا بدك تروح روح وأنا قلبي تعود عالعذاب
علّمت قلبي من الطفوله عا هواك وما تطلّعت هالعين إلا عا حماك
ألله بيشهد ما ضحكت مرة لسواك وليش بتضلّك تفتحلي بواب
عايشه بعيده عن ليالي الصفا عيشة جفا وحكي مع الناس بجفا
يا هل ترى مش هيك بيكون الوفا و كيف بيكون الوفا اعطيني جواب؟
ان كان غيرة هالجدال وهالشكوك أضنيتني يكفي بقا يرحم أبوك
وان كان غيري حباب عم يعلموك الله يباركلك يا ولفي بهالحباب
كلّ ما عم زيد في حبك ولوع كلّ ما بتزيد في عيني الدموع
ويا ريت عن حبك المضني لي رجوع رح تهرب الأيام ويمرّ الشباب
وَينْ بتلاقي متل قلبي قلوب شو صار صافيلك وغافرلك ذنوب
و قديش عن حبك قلت بكرا بتوب ما تبت يا ولفي ولا هالقلب تاب