اسهري يا عين وافرح يا قدر... غلطتي بالحب قلبي ما يتوب
غلطتي حاولت اوصل للقمر... بالامل سافرت مع ريح الجنوب
مركبي دمعه ومجدافي سهر... بين موج الليل ابحث عن دروب
لو فؤادي من حديد او من حجر... ما تحمل كان يا روحي يذوب
وعسى ما شفت من هم وكدر... من عقب فرقاك تكفير الذنوب
زرتني بالحلم بثوب ٍ خضر ... اسمك المعروف نهاب القلوب
العيون اللي بها سحر وسهر... لى مشى مياس القد الطروب
والخدود اللي بها لون الزهر... والعيون النجل والرمش اللعوب
زارني طيفك وجاب احلى خبر... موعد ٍ منك ولو وعدك كذوب
المكان اخترت لي شط البحر.. والزمان اخترت لي وقت الغروب