ياكريم المشاعر وش تبيني اقول = ما تركت الصعيب وما تركت السهل
من عرفت المعاني وانت راعي الأصول = من عرفتك تعاني وانت مثل الجمل
لا تطري الغياب ولا تطري الأفول = من عرفنا الكواكب بدرنا ماافل
ما يزعزع جبل طويق ريح المحول = العزا يا رفيقي في الصبر والعمل
وان مشيت بطريقك احتزم بالحلول = افتر الرأي واضرب بين ظلم وعدل
يا قوي التوكل من تصبر ينول = ريح البال تكفى يا ثقيل الحمل
لو حسبنا حساب سهيل قبل الدخول = ما تساقط رطبنا من علو النخل
الليالي تقلب والعتب للفحول = والمشاريه واجد بس من يحتمل
لو سقينا عتبنا كل ريق معسول = ما تحن السواني للسدر والأئل
يا طريق الترجي لا تظنه ملول = اشهد انه بيمشي لين ترخي الحبل
والمهر للبتول للي مثلك يطول = والتمني طروقه بين رفض وجدل
لو تزرى المتون وقام جمع الفلول = ما يسد النحور الا علوم الجزل
مثل حزن المغادر مثل وهج الوصول = شفت طب القلوب وشفت خطب انجلل
بين كبت الحقيقه وبين راس الجدول = الخواطر توارت بين نقض وفتل
هيم الحر هومات الشجاع الصمول = ما بعد رد شوفه للقطا والحجل
والله انك وسيع الصدر منتب زعول = والنعم والنعم بك والنعم بالأهل