ياناس راح عبيد من غدى وضاع

والعقل عقب عبيد تايه وضايع

أقفى وانا بوقت الضحى بحزة قداع

كنا على القهوى نقول الروايع

 

لو انصدم كان الخبر ياملا شاع

تفزع له العالم ولوهي هجايع

ما أعتقد شاله من الباب طماع

قصده يدور من وراه الطمايع

 

عمره ثلاث سنين ماهو برضاع

ما اضنه اقفى يامخاليق ضايع

بالحلم أشوفه يأشرلي بالاصباع

ويفز من نومه اذا صحت فايع

 

أسمع ابكاه اليا من اصغيت الاسماع

واحس به لامن ضما وصار جايع

واشوفه اذا نام نومه على ذراع

يصيح يبي امه تجيه بفزايع

 

ياعبيد انا كثرت همومي والاوجاع

وفي كل لحظه بي تزيد الفجايع

لو رجعتك ياعبيد تشرى او تنباع

لشريك مهما كثروا بك طمايع

 

يالله تفرج كربتي بساع

ياواحدن يمشي لك العبد طايع

أشكيك م اشكي لمن عنده اسناع

يرحم قلوبن مع بعضها ولايع

 

واشكي لك مخلوق يمشي على القاع

يرحم فؤاد امن لها طفلن ضايع

هذي حقيقه ياملا ماهي ابداع

قصة ضياع عبيد حلو الطبايع

 

 

 

•?• هلا باللي •?•

 

كلمات: محمد المسحل

 

هلا باللي بعد غيبه طويله

يسلي وحدتي بين الليالي

هلا باللي يسميني خليله

وكل الناس يعرفونه حلالي

 

يجيني وبهدب عيني اشيله

ويلاقيني وسيله بالوصالي

يخبرني عن همومن ثقيله

واذا ضاقت به الدنيا شكالي

 

الا كلمني حروفه جميله

لو انه بالذرابه مايبالي

خفيف الظل اجنابه نحيله

حبيبي لا مشا مثل الغزالي


مختارات من الصور من حول العالم