تدفعني أشواقي ويرهبني البوح.. ماغير ألمح لك عن الحال تلميح
ويضيع رجع الصوت واقول مسموح.. كم حيرة فيها عن النفس ترويح
خطاي محسوب وخطا الوقت مدموح.. والنفس تجزع والعواذل مشافيح
أصعب سؤال أواجهه وين ماروح.. به ينبني قصر للاحلام ويطيح
الصدفه اللي ساقت الروح للروح.. وش منتهاها بالقلوب المجاريح
ظنيتها مبدأ تباشير وفروح.. وحد للوعات الضنا والتباريح
مدري صدق ظني وانا صرت مشفوح.. أستعجل الأيام للحيرة تزيح
أعيش خالي البال والصدر مشروح.. مابيني وبين السعادة سواميح
أونها لي زود تعذيب وجروح.. مادري ولاني طالب منك توضيح
أستعذب الحرمان عن رهبة البوح.. أخاف تحصل قصة السفن والريح