من روحٍ تحبك ومن قلب فخور
بمحبتك يا ربة القلب الكبير
ودي أقولك شي في بالي يدور
دام انتي في الدنيا ترى الدنيا بخير
وين أبتدي كيف أنتهي وبأي شعور
يا أم أطهر وصفه من ماي الغدير
وكيف أجمع أوصافك وما أحس بقصور
لو كان ذات المدح قدامك قصير
انتي الفؤاد اللي أبد ما فيه جور
وانتي العيون اللي أشوف بها وأسير
وانتي الاسم ياللي في طاريه البخور
يفوح ويغمر طيبه كبير وصغير
انتي الحبيبة الغالية انتي الجذور
وأم الحنان انتي وأفضالك كثير
والناس لو مثلك بها رحمة ونور
والله ما يبقى في هالعالم فقير