ياقرة العين لك حول السنه غايب.. غايب وعن ناظري صورتك ما غابت
من صدتك يا حبيبي صرت انا هايم.. والا المشاعر تراها ما بعد هابت
في ما حصل منهو المخطي من الصايب.. يالله عسى دعوة الحساد ماصابت
لا تبعدك عن حبيبك كلمة الخايب.. اللي ضنونه من اول كلها خابت
خل العتب بيننا يامهجتي ذايب.. من شان قلبين من زود الوله ذابت
لا تحسب ان الغلا في خافقي شايب.. يكفي حروفي بوصفك مابعد شابت
معك الغلا ساس برجه مابني عايب.. تبقى جسوره مدى الأيام ما عابت
كان السبب في جفاك وصدتك تايب.. قبلك ترى ناس واجد حبت وتابت
وان كان ماطاب لك وقتٍ قبل طايب.. قلي واداوي جروحٍ منك ماطابت