شيلني و اشيلك

دنا برض فرحت لك

و انا بتاعك يا بيه

و اعرف

ما اعرفش ليه

 

و كام عبد المعين

لابد ف المسؤولين

و انا بتاع

كل حاجه

و دراعك اليمين

 

و سواق المدير

و هتيف الوزير

و مهماز المدام

و نبوت الغفير

و فراش العياده

و خدام السياده

للي من غير سناده

يثعكز ع السرسر

و ناس بدم ساقع

واقفين وراء البراقع

يميعوا المباديء

يضيعوا الشرائع

 

و من خلف شيش

خايفين من الشاويش

سلبيه الميه الميه

تعالى

لا ما اجيش

 

دا كان كلام زمان

ما يبقالوش مكان

ف مجتمع نضال

بيعجن الرجال

بالصهد و العرق

و لو حس الالم

يوشوش الالم

يصرخ ع الورق

يقول كل الكلام

عريان ما يزوقوش

و يوصف الالام

للي ما تالموش

 

اصل احنا شعب طيب

و الطيبه فينا بلوه

تاخدنا من قريب

و تجيبنا كلمه حلوه

 

سامعين يا اهل البلد

و لا امسك النفير

يا البنت

يا الولد

يا المجدع الكبير

عارفين ماشيين منين

و السكه السالكه فين؟

مشوارنا مش هوين

و ما هواش بالقليل

مهما الخيال يزين

لس الطريق طويل

 

عايزين همه رجال

ابعد من المحال و اسرع من الامل

تزلزل الجبال

و تخلق المجاله للعدل والعمل

 

و يطلع خير بلادنا

على ذمه ولادنا

و تبقى عيشه جنه و ملو الصحن حنه

على كفوف الصبايا

و اعيش و اشوف ولادي

مالين عين الاعادي قايمين للعزرايه

 

و اقعد ويا الصحابه

و نقول على الربابه

يا جيل الانجازات

يا جيل المحظوظين

ابوك السقا مات

من شرب الميه طين


مختارات من الصور من حول العالم